Mga makapangyarihang bansa kaibigan ng Pilipinas

                     Tiniyak kahapon ni United States President Donald Trump kay Pa­ngulong Rodrigo Duterte sa kanilang bilateral talks na kaibigan niya ang Duterte administration.

                    Ayon kay Presidential Spokesman Harry Roque, tumagal ng halos isang oras ang bilateral meeting nina Pangulong  Duterte at Trump kung saan ay pinatatag pa lalo nito ang ugnayan ng Pilipinas at US na ginanap sa PICC, Pasay City matapos ang formal opening ng plenary session ng 31^st ASEAN Summit sa Cultural Center of the Philippines (CCP).

                   Ayon kay Roque, nag­karoon ng prangkang usapan sina Pangulong Duterte at Trump na inabot ng 40 minuto kung saan siniguro ni Trump na kaibigan siya ng Pangulo at gaya ng nagdaang mga administrasyon ng Estados Unidos ay patuloy ang “close ties” o magandang relasyon sa pagitan ng dalawang nabanggit na bansa.

                   Nangako si Trump na malalapitan siya bilang isang kaibigan ng Duterte administration.

                    Sinabi ni Roque na hindi natalakay sa pag-uusap nina Duterte at Trump ang isyu ng karapatang pantao.

                 “The issue of human rights did not arise. It was not brought up,” wika ni Roque.

                   Mismong si Pangulong Duterte umano ang nagbukas ng isyu ng drug war nito kay Trump at walang opisyal na inilabas na posisyon ang US president sa mainit na usapin sa extra judical killings o human rights.  

                    “It was President Duterte who discussed with President Trump the drug menace in the Philippines, and the US President appeared sympathetic and did not have any official position on the matter, merely nodding his head, indicating that he understood the domestic problem that we face on drugs,” dagdag ni Roque.

                     Tinalakay din ng dalawang lider ang usapin ng kalakalan at iminungkahi ni Pangulong Duterte ang kahalagahan ng pagkakaroon ng free trade sa pagitan ng Pilipinas at US at sinabi ni Trump na kanyang pag-aaralan ang usapin.

                     Pinasalamatan umano ni Duterte si Trump dahil sa mga tulong ng US sa Marawi conflict.

                     Pinuri at pinasalama­tan pa ni Trump ang Pa­ngulo sa matagumpay na pagiging host ng 31^st ASEAN Summit.

                    “Rodrigo (Pres. Du­terte), I would like to commend you on your success as ASEAN chair at this critical moment of time ...The show last night was fantastic. And you were fantastic,” wika ni Trump sa ginanap naman na ASEAN-US 40th Anniversary Commemorative Summit.

                        Muling tiniyak ng US president na lalong pala­lakasin ng Trump admi­nistration ang relasyon nito sa Pilipinas gayundin sa ASEAN.

Pilipinas nakiisa sa pagpirma sa ‘landmark document’

                   Nakikiisa si Pangulong Rodrigo Duterte sa mga world leaders at dialogue partners sa layuning lagdaan sa isang “landmark document” na layuning mas mapalakas ang social protection, access to justice at health services sa pagbubukas ng 31^st ASEAN Summit kahapon ng umaga sa Cultural Center of the Philippines (CCP).

                  “I will be joining ASEAN leaders in signing landmark document that would strengthen social protection, access to justice & health services,” wika ni Pangulong Duterte sa kanyang opening statement sa pormal na pagbubukas ng 31^st

 ASEAN Summit.

                    Sa kanyang opening statement, tinukoy ni Du­terte ang isyu ng terorismo na banta ng seguridad ng ASEAN, ang naganap sa Marawi City at sa mga suportang tinanggap ng Pilipinas mula sa mga kaalyadong bansa.

                    Nagpasalamat si Du­terte sa mga ASEAN countries at dialogue partners sa pagtulong sa komunidad na naapektuhan ng Marawi crisis.

                  “Our ASEAN brothers provided support by sending relief items, while others boosted our military,” dagdag pa nito.

                    Binanggit pa ng Pa­ngulo ang isyu ng illegal drugs na banta sa buhay at seguridad ng mamamayan at buong mundo.

                    “Illegal drugs endanger the very fabric of our being. Terrorism and extremism endanger security of ASEAN,” wika pa ni Pangulong Duterte.

                     Pinasimulan ang summit opening sa traditional handshake ng mga world leaders dakong alas-9:47 ng umaga na sinundan ng pagkanta ng ASEAN hymm na may titulong “ASEAN Song of Unity” bago nagsalita ang Pangulo.

Mga raliyesta gustong ipamukha sa ASEAN Summit na naging madugo ang kanilang kilos protesta

                     Isa sa mga paraang naisip ng mga kontra Duterte ang ipakita at ipamukha sa mga bisita sa ASEAN Summit na naging marahas at madugo ang kanilang ginagawang kilos protesta.

                     Ibat-ibang grupo ang nagrarally ngayon malapit sa may US embassy para daw ipakita ang kanilang sentimento. Pero hindi lang rally ang pakay nila, gusto talaga nilang pagalitin ang ating mga kapulisan para sila ay masaktan at para may pagpiyestahan ang mga main stream media na kasabwat ng kultong dilawan.

                     Pero pasalamat tayo sa ating mga kapulisan na naging matatag at hindi kumakagat sa mga ginagawang pananakit ng mga hunghang na raliyesta. Kung ang gusto nila ay magrally lang pwede silang magrally ng boung buwan pero talagang inuudyok nila ang ating mga kapulisan para sila ay masaktan at makunan ng video.

                    Hindi na uubra mga bulok na istilo ninyong mga bayarang raliyesta. Ang sasarap ninyong pagbubuhusan ng kumukulong tubig. Dapat ang iproprotesta ninyo ang katamaran ng ibang senador na walang ginawa kundi magpapansin. Hindi yata alam na ang trabaho ng senador ay ang mag-isip ng mga batas para sa ikabubuti ng lahat. At hindi ang kung sinu-sino na lang ang pagsasampahan ng mga walang kwentang kaso.

                 

Pnoy todo deny sa mga kasong kinakaharap

                Kinasuhan na sa Sandiganbayan ng Office of the Ombudsman si dating Pangulong Noynoy Aquino kaugnay ng “Oplan Exodus” sa Mamasapano, Maguindanao na ikinasawi ng 44 miyembro ng PNP-Special Action Force (SAF) noong Enero 2015.

                Mga kasong paglabag sa Anti-Graft and Corrupt Practices Act at Article 177 ng Revised Penal Code o Usurpation of Official Function ang inihain laban sa dating pangulo.

                Matatandaan na sa Oplan Exodus ay napatay ang target na teroristang si Zulkifli Binhit alyas Marwan subalit napatay din ang tinaguriang SAF 44.

                Taliwas naman ito sa inihaing reklamo ng mga kaanak ng SAF 44 sa Ombudsman laban kay Aquino na reckless imprudence resulting in homicide subalit hindi ito kinatigan ng anti-graft body dahil sa kawalan ng ebidensiya.

                 Base sa impormasyon ng kaso, dapat managot si Aquino sa Mamasapano incident dahil iligal ang ginawa niyang pagpayag kay dating PNP Chief Alan Purisima na makiisa sa pagplano at pangunahan ang implementasyon ng Oplan Exodus habang siya ay suspendido pa.

                 Ang suspension noon ni Purisima ay para sa hiwalay niyang kaso kaugnay naman sa umano’y ano­malya sa courier service para sa lisensya ng baril.

                Sa naging paliwanag noon ni Aquino, ibinaling niya ang pananagutan sa sinibak na si Purisima at dating PNP-SAF director Chief Supt. Getulio Napeñas kaya’t pumalya ang operasyon.

                Nauna namang nai­sampa sa Sandiganbayan ang kaso sa mga kapwa akusado ni Aquino na sina Purisima at Napeñas.

                Inirekomenda ng Ombudsman ang P30,000 piyansa para sa kasong graft at P10,000 para sa kasong usurpation of official function para sa pansamantalang kala­yaan ni Aquino.

Kasong rape laban sa trader na sangkot sa P6.4-B shabu shipment, ibinasura

                 Ibinasura kahapon ng Parañaque City Regional Trial Court ang kasong rape laban sa isang negosyante na da­ting humarap sa Senado at isa sa isinasangkot sa illegal na pagkakapuslit ng may P6.4 billion shabu shipment sa Bureau of Customs (BOC).

                 Ang kasong rape laban sa kilalang negos­yanteng si Kenneth Dong ay ibinasura sa sala ni Parañaque City Regional Trial Court (RTC) Judge Aida Estrella Macapagal ng Branch 195 matapos umanong umurong ang 33-anyos na complainant sa kasong panggagahasa na naganap noong Abril 10, 2016 sa Parañaque.

                  Kinumpirma ito kahapon ng abogado ni Dong na si Atty. John Ungab.

                  Ang pagkakabasura sa kasong panggagahasa laban kay Dong ay bunsod sa inihaing “affidavit of desistance” ng complainant nito, dahilan upang palayain siya ng National Bureau of Investigation (NBI) kung saan siya nakakulong.

                   Hindi naman idinetal­ye ni Ungab kung bakit umurong sa kaso ang babaeng nagsampa ng kaso laban sa kanyang kliyente.

                   Si Dong ay unang inaresto ng mga tauhan ng  NBI noong Agosto 15 habang dumadalo sa pagdinig ng Senado kaugnay sa P6.4 billion illegal shabu shipment sa BoC.

                   Magugunita na tinukoy ng testigong si Mark Taguba sa imbestigasyon ng Senate Blue Ribbon Committee sa pagkakapuslit ng P6.4 bilyong shabu sa BOC na si Dong ang nagsilbing “middleman” sa Chinese businessman na si Richard Tan na nagmamay-ari naman ng isang warehouse sa Valenzuela City na binagsakan ng 604 kilong shabu.

                   Si Dong ay sinasabing malapit din sa mga politiko tulad nina Senators Miguel Zubiri, Risa Hontiveros, Senator Francis Pangi­linan, Joel Villanueva at Senate President Pro-tempore Ralph Recto.

Killer ng Grab driver nakonsensya, sumuko

                    Sumuko na sa mga awtoridad ang pangunahing suspect sa pagpatay sa Grab driver na si Gerardo “Junie’ Maquidato Jr., na iniharap sa media ni Philippine National Police (PNP) Chief P/Director General Ronald “Bato “ dela Rosa sa Camp Crame kahapon.

                   Kinilala ang suspect na si Narc Tulod Delemios , guma­gamit ng mga alyas na Miko at Real Nikolo Delemios.

                    Ayon kay dela Rosa si Delemios ay natukoy na siyang bumaril at nakapatay kay Maquidato na hinoldap nito noong Oktubre 26 ng gabi sa Bonanza Street, Brgy. 189, Don Carlos Village sa lungsod ng Pasay.

                    Ang suspect ay sinundo ng mga pulis nitong Martes ng gabi sa tahanan nito sa Kaymito Street . Brgy. Sto Niño , Pasay City matapos na magpahayag ng hangarin ang biyenang babae ng suspect na pasukuin na ito ng mapayapa sa mga awtoridad .

                     Ayon sa imbestigasyon, ang suspect ay nagpanggap na pasahero ng Grab na ginamit sa pagpapa-book ang mobile phone ng kaniyang live-in partner na si Giselle Capati, 23, na una nang natukoy ng mga awtoridad matapos na suriin ang cellphone ng biktima.Nabatid na matapos na barilin si Maquidato ay tinangay pa ng suspek ang perang kinita ng nasabing Grab driver at kinarnap ang minamaneho nitong Toyota Innova van na narekober ng pulisya sa Brgy. Matatalaib, Tarlac City kamakalawa.

                  Sa imbestigasyon,  sinabi ni dela Rosa na ang suspect ay may standing warrant of arrest sa Parañaque Regional Trial Court (RTC) Branch 257 kaugnay ng pagpatay sa biktimang si Gino Balbuena noong Oktubre 2014 sa Baclaran.

P1-M marijuana plantation sinalakay sa Sultan Kudarat!

              Sinalakay ng mga anti-narcotics agent nitong Lunes ang isang plantasyon ng marijuana sa Palimbang, Sultan Kudarat, at binunot ang mga halaman ng marijuana na nagkakahalaga ng aabot sa P1 milyon.

             Ayon kay Philippine Drug Enforcement Agency (PDEA)-Region 12 Director Cesario Gil Castro, kasama ang mga tauhan ng Philippine Marines ay sinalakay nila ang liblib na Barangay Napnapon sa Palimbang, kasunod ng impormasyong natanggap nila na mayroong plantasyon ng marijuana sa lugar na pinangangasiwaan ng isang “Motmot Sakay”.

             Gayunman, nakatakas si Sakay sa kasagsagan ng anti-drug operation.

            Kilala sa pagbebenta ng marijuana sa lugar, kakasuhan si Sakay sa pagtatanim ng mga halamang maituturing na dangerous drug.

            Nito lamang Nobyembre 4 ay sinalakay din ng PDEA ang isa pang plantasyon ng marijuana sa liblib na Bgy. Sumalili sa Arakan, North Cotabato.

            Nakumpiska ang mga halaman at binhi ng marijuana na nagkakahalaga ng P500,000 mula sa nagtatanim nitong si Jerome Tulosan, 25, na isa sa big-time marijuana trafficker sa North Cotabato.

            Sinilaban naman ng raiding team ang mga nasamsam na halamang marijuana sa lugar.

            Nakasuhan na si Tulosan, na nakapiit ngayon sa detention facility ng PDEA-Region 12 sa General Santos City.

Harry Roque: Posibleng may nangyaring EJK!

                 Nilinaw ng bagong tagapagsalita ng Pangulo na si Harry Roque ang usapin sa “extra-judicial killings” (EJKs) nang sabihin niya sa isang panayam ng radyo nitong Linggo na posibleng mayroong mga insidente ng EJK at mga paglabag sa karapatang pantao sa bansa. Subalit dapat na may ebidensiya ang bawat isa sa mga ito, aniya.

                 Isang pasulong na hakbang ito mula sa iginigiit ng Philippine National Police (PNP) na “officially” ay “no case” ng extra-judicial killing sa ilalim ng administrasyon ni Pangulong Duterte, at binigyang-diin ang kahulugang nakasaad sa isang lumang executive order na ipinalabas ni dating Pangulong Benigno S. Aquino III na ang EJK ay pagpatay na isinagawa ng mga puwersa ng estado at ng hindi mula sa estado “to silence, through violence and intimidation, legitimate dissent and opposition raised by members of civil society, cause-oriented groups, political movements, people’s and non-government organizations, and by ordinary citizens.”

                 Kinikilala ng PNP na may 3,850 hinihinalang sangkot sa droga ang napatay sa mga operasyon ng pulisya kontra droga at nasa 2,290 ang napaslang sa motibong may kinalaman sa ilegal na droga, karamihan ay hindi natukoy ang salarin.

                 Kabilang sa mga ito ang 17-anyos na si Kian Loyd delos Santos na napatay ng mga pulis-Caloocan na nagsabing nanlaban ang binatilyo gayung sa mga kuha ng CCTV camera ay nakitang nasa kustodiya at kontrolado na siya ng mga pulis.

                 Pinanindigan din ni Justice Secretary Vitaliano Aguirre II ang lumang kahulugan na ito ng EJK at sinabing hindi iimbestigahan ng Inter-Agency Committee on EJKs ang mga pagpatay sa mga drug suspect sa nakalipas na mga buwan.

                 Iginiit din ni dating Presidential Spokesman Ernesto Abella na nasasaklaw ang gobyerno ng partikular na kahulugang ito. Gayunman, tiniyak niyang anuman ang kahulugang legal, titiyakin ng pamahalaan na mananagot ang mga may sala at nanawagan na lumantad ang mga testigo at ang iba pang indibiduwal na may hawak na ebidensiya.

                Nitong Linggo, sinabi ng bagong tagapagsalita ng Pangulo na si Roque na alinsunod sa tinaguriang Minnesota Protocol ng United Nations, ang lahat ng pamamaslang na ginawa nang hindi sumailalim sa paglilitis o proseso ay itinuturing na extra-judicial killings. Isa itong positibong hakbangin para sa gobyerno. Kahit pa hindi ipasisiyasat ni Secretary Aguiree ang libu-libong kaso ng pagpatay sa mga drug raid ng pulisya sa Inter-Agency Committee on EJKs, umaasa tayong mismong ang gobyerno na ang mag-iimbestiga sa usapin.

                Ito ay dahil itinatakda ng Minnesota Protocol ang imbestigasyon sa lahat ng “potentially unlawful death, primarily including deaths caused by acts of omissions of the state, its organs, or agents; deaths occurring when a person is detained by or is in custody of the state or its agents; and death where the state may have failed to meet its obligations to protect life.”

                Subalit dapat na may ebidensiya bago ituring na EJK nga ang isang kaso, ayon kay Roque. Siyempre pa, kailangang may patunay. “If there is evidence that they violated the law and committed murder, they need to be tried,” dagdag niya.

               “But if it’s true that the person fought back, then we need to acknowledge the police. Because there are really cases where the drug suspects fought back.”

               Matatagalan pa bago masimulan ang pagsisiyasat sa libu-libong pagpatay na nakatala na sa pulisya. Sa ngayon, mahalagang mayroon nang opisyal na pagsisikap na mabusisi ang mga ito sa posibilidad ng extra-judicial killings, sa halip na ang unang paninindigan na walang kahit isa man na kaso ng EJK sa ilalim ng kasalukuyang administrasyon.

Ombudsman pangungunahan ang pagsisiyasat sa 6.4bilyong shabu napuslit!

                Iimbestigahan na ng Office of the Ombudsman ang pagpuslit ng P6.4 bilyong shabu sa bansa mula China.

                Inilabas ni Ombudsman Conchita Caprio-Morales ng Office Order No. 765 na nag-uutos sa isang special panel ng fact-finding investigators na mag-imbestiga sa usapin.

                Kapag napatunayan na nagkasala ang ilang tauhan ng Bureau of Customs (BOC), maaari pa ring managot ang mga ito kahit karamihan sa kanila ay nagbitiw na sa tungkulin.

                Samantala, inaasahang tatapusin ng Department of Justice (DOJ) ngayong araw (Nobyembre 8) ang preliminary investigation nito sa criminal complaints na inihain laban sa mga sangkot sa P6.4 bilyon illegal drugs shipment.

                Nakatakdang maghain sina dating Customs commissioner Nicanor Faeldon at mga kapwa niya akusado ng kani-kanilang rejoinders sa kaso.

               Dahil hindi inaasahang hilingin na sumagot ang complainants sa rejoinders, ang panel of prosecutors na nagsasagawa ng preliminary investigation ay dapat ideklara ang kaso na submitted for resolution.

               Nagsagawa ang DOJ ng preliminary investigation kaugnay sa kasong kriminal na inihain ng National Bureau of Investigation (NBI) at ng Philippine Drug Enforcement Agency (PDEA) laban kay Faeldon at iba pang respondent.

               Inaakusahan ang mga respondent ng drug importation at coddling of drug traffickers bilang paglabag sa Republic Act 9165 o ang Comprehensive Dangerous Drugs Act of 2002.

               Bukod kay Faeldon, kabilang sa mga kasalukuyan at dating opisyal at tauhan ng Bureau of Customs (BOC) na pinangalanang respondents ay kinabibilangan nina directors Milo Maestrecampo at Neil Anthony Estrella; intelligence officers Joel Pinawin at Oliver Valiente; Manila International Container Port district collector Atty. Vincent Phillip Maronilla; nobya ni Faeldon na si Atty. Jeline Maree Magsuci; at BOC employees na sina Alexandra Ventura, Randolph Cabansag, Dennis Maniego, Dennis Cabildo at John Edillor.

               Respondents din ang facilitators ng shipment, na sina Mark Taguba II, Teejay Marcellana, Chen Ju Long, Chen Rong Juan, Manny Li, Kenneth Dong, Eirene May Tatad, Emily Dee, Chen I-Min at Jhu Ming Jyun.

               Isinama rin sa respondents ang mga opisyal ng Hong Fei Logistics Inc., na nagmamay-ari ng bodega kung saan nasamsam ang drug shipment, na sina Genelita Arayan, Dennis Nocom, Zhang Hong, Rene Palle, Richard Rebistual at Mary Rose Dela Cruz.

               Nasamsam ng pinagsanib na operatiba ng BOC, PDEA, at NBI ang 604 kilo ng methamphetamine hydrochloride o shabu noong Mayo 26 sa kanilang raid sa bodega ng Hongfei Logostics sa Valenzuela City.

               Nakapasok ang shabu shipment sa bansa sa pamamagitan ng BOC matapos itong ideklara bilang kitchenware, footwear at moldings.

DOH gustong baguhin ang serbisyo!

                  Paiigtintin ng Department of Health ang pakikipagugnayan di lamang sa mga LGUs kundi maging sa Civil Service Commission.

                  Ito ayon kay Health Secretary Francisco Duque III, ay dahil sa CSC bumabagsak ang mga sumbong, reklamo at suhesyon ng publiko kaugnay sa serbisyo ng mga pampublikong ospital.

                 Ayon kay Duque, sa ganitong paraan, mababatid nila ang mga dapat isaayos at tutukan sa mga pampublikong ospital, lalo’t isa sa target ng ahensya ay ang mailapit ang serbisyong pangkalusugan sa mga mahihirap

                Iginiit ni dating Customs INTELLIGENCE CHIEF NEIL ESTRELLA na walang probable cause para kasuhan siya sa korte kaugnay ng 6.4-billion pesos shabu shipment mula sa China.

                Ayon kay Estrella , nababahala siya na makalusot sa pananagutan ang mga direktang responsable sa pagkakapuslit sa bansa ng naturan shabu shipment.

                Si Estrella ay muling nagtungo sa Department of Justice (DOJ) para magsumite ng rejoinder sa kasong inihain ng Philippine Drug Enforcement Agency (PDEA).

               Nanindigan si Estrella na hindi sapat ang argumento ng PDEA para sabihin na may probable cause para masampahan ang Customs officials.

               Aniya, pinasisinungalingan mismo ng certificate of coordination na inisyu ng PDEA ang alegasyon nito na sinapawan ng BOC-CIIS ang kanilang kapanyarihan na magsagawa ng drug investigation.


              Pinapatunayan aniya ng nasabing certificate na ang drug operation na ginawa sa Valenzuela warehouse noong Mayo ay isinakatuparan sa ilalim ng hurisdiksyon ng PDEA.

ASEAN Summit hangad ang tunay na pagbabago!

                 Sa susunod na linggo ay idaraos sa Pilipinas ang ika-31 ASEAN Summit, ang pagpupulong tuwing dalawang taon ng mga pinuno ng 10 bansang miyembro ng Association of Southeast Asian Nations (ASEAN). Ang ating bansa ang tagapangulo sa taong ito, na siya ring ika-50 anibersaryo ng asosasyon na itinatag noong 1967.

                 Ito rin ang ikalawang pagtitipon ng mga pinuno ng ASEAN na isinasagawa sa Pilipinas sa taong ito. Ang una ay ang ika-30 ASEAN Summit na pinangunahan ni Pangulong Rodrigo Duterte noong Abril.

                Sa pagpupulong sa susunod na linggo, pag-uusapan ng mga bansang kaanib sa ASEAN ang kalakalan, seguridad at kalikasan sa rehiyon, at maging ang pag-aagawan sa teritoryo sa South China Sea.

                Mahalaga na magkaisa ang mga pinuno ng ASEAN sa pagharap sa mga hamon na kinakaharap ng rehiyon. Ilan sa mga ito ang terorismo, kaunlaran ng ekonomiya, karapatan ng mga manggagawang migrante, kalikasan at hindi pantay na kinikita.

               Ang prinsipyong ito ay nakabaon na sa ASEAN mula pa nang ito ay maitatag. Ipinaliwanag ng Bangkok Declaration na dapat makilala ang pagkakaroon ng parehong interes at problema ng mga bansa sa Timog-Silangang Asya at ang pangangailangan na dapat palakasin ang kanilang pagkakaisa at kooperasyon. Namamalagi ang prinsipyong ito pagkaraan ng 50 taon.

               Ang Pilipinas ay bahagi ng orihinal na pagtatatag ng ASEAN, kasama ang Indonesia, Malaysia, Singapore, at Thailand.

               Umanib sa grupo ang Brunei noong 1984, ang Vietnam noong 1995, ang Laos at Myanmar noong 1997 at ang Cambodia noong 1999.

               Layunin ng asosasyon, batay sa Bangkok Declaration, na isulong ang mga layunin ng ASEAN, gaya ng pagpapabilis ng paglago ng ekonomiya, at kaunlaran sa lipunan at kultura sa rehiyon sa pamamagitan ng sama-samang paggawa upang mapalakas ang pundasyon para sa isang masagana at mapayapang komunidad ng mga bansa sa Timog-Silangang Asya.

               Sa pagdiriwang ng ika-50 anibersaryo, kailangan ding harapin ng ASEAN ang mga hamong dala ng pagbabago sa daigdig.

               Ang isyu ng integrasyon ng ASEAN ay kasabay ng globalisasyon at rehiyonalismo sa daigdig. Ang pagkalas ng United Kingdom sa European Union at ang pagbaling ng paningin ng Estados Unidos sa interes na panloob ay tila magkataliwas na pananaw sa daigdig.

               Ang pangungulo ng Pilipinas sa ika-31 ASEAN Summit ay nataon din sa pagtataguyod ng kalayaan ng Pilipinas sa pandaigdig na komunidad ng mga… bansa. Sa ilalim ni Pangulong Duterte, nakuha natin ang paggalang ng ibang bansa.

Mula sa polisiya ng takot, ang ating polisiyang panlabas ngayon ay polisiya ng pagkakapantay-pantay. Itinataguyod natin ang sarili nating prinsipyo at interes kahit na ito ay taliwas sa kagustuhan ng mga makapangyarihang bansa. Ito ang naging gabay natin sa relasyon natin sa China, Hapon, Russia, at Estados Unidos.

Asahan natin na ang pagtatagumpay ng ika-31 ASEAN Summit sa pagsusulong sa integrasyon sa rehiyon, sa kooperasyong pang-kabuhayan at pang-seguridad, kalakalan, at kapayapaan. Angkop na angkop ang tema ng pangungulo natin sa ASEAN: “Partnering for Change, Engaging the World.”

Trillanes gustong magpapansin ulit!

                 Kakasuhan ngayong Miyerkules ni Senator Antonio Trillanes IV sa Office of the Ombudsman si Senator Richard Gordon kaugnay ng umano’y kinasangkutan nitong anomalya bilang chairman ng Philippine Red Cross (PRC).

                 “I will be filing the case tomorrow, plunder, against Senator Gordon. Tomorrow morning ‘yan. This is in relation doon sa pag-plunder niya nung pondo ng gobyerno na ipina-allocate niya sa Red Cross,” sinabi kahapon ni Trillanes sa Kapehan sa Senado. “Ginamit niya and Red Cross para sa sariling interest.”

                 Aniya, mahigit P50 milyon ang sangkot na halaga kaya pasok talaga sa plunder ang kaso, at halos kapareho umano ito sa operasyon ni Janet Lim-Napoles, ang sinasabing pangunahing suspek sa “pork barrel” fund scam.

                 “Nung Senador siya, nung first term niya, nag-allocate siya ng pondo sa Red Cross habang chairman siya. Bawal ‘yun, parang Napoles scam ‘yun,” ani Trillanes. “Kung titingnan mo walang problema. Kaso siya ang chairman, siya ang nagdi-disburse ng pondo.”

                 Sinabi pa ni Trillanes na hihilingin din niya sa Commission on Audit (CoA) at sa International Federation of the Red Cross na magsagawa rin ng sariling imbestigasyon sa usapin.

                 Setyembre ngayong taon nang ihayag ni Trillanes na kakasuhan niya si Gordon, na nakainitan niya sa kasagsagan ng pagdinig ng Senado sa P6.4-bilyon shabu shipment. Matatandaang inakusahan ni Trillanes si Gordon na nag-aabogado para sa mga Duterte.

                  Dahil dito, sinampahan ni Gordon ng reklamo si Trillanes sa ethics committee, na ginawa rin ni Trillanes laban sa kanya.

                  Samantala, sinabi ni Trillanes na maghahain naman siya ng kasong libel laban sa Thinking Pinoy blogger na si RJ Nieto at sa isang kolumnista sa pagpapakalat umano ng “fake news”, nang banggitin ng mga ito sa kani-kanilang artikulo na tinawag ni United States President Donald Trump ang senador na “little narco-politician.”

                   “Pine-prepare na ng abogado ko ‘yung libel case, so kakasuhan na namin siya. ‘Yung nagkalat sila ng fake news na tinawag daw ako ni President Trump na ‘little narco’. Maliwanag na ‘yun sa US government website on the presidential pronouncements and interviews na wala talaga dun. So, kasinungalingan talaga ‘yan,” ani Trillanes.

12 pang Maute stragglers todas sa clearing ops!

                     Labingdalawa pang Maute-ISIS stragglers kabilang ang pinsan ng Maute brothers ang napaslang matapos na makasagupa ng tropa ng pamahalaan na nagsasagawa ng clearing operations sa main battle area sa lungsod ng Marawi sa halos maghapong bakbakan kamakalawa.

                     Ayon kay AFP Western Mindanao Command Commander Lt. Gen. Carlito Galvez Jr., nagsimula ang bakbakan kamakalawa ng umaga na umabot hanggang hapon.

                      Isa sa mga nasawi ay kinilalang sina Ibrahim Maute alyas Abu Jamil, pinsan ng Maute brothers na sina Omar at Abdulkhayam Maute na pawang namuno sa Marawi City siege.

                     Sa clearing operations, unang narekober ang bangkay ng walong Maute-ISIS stragglers sa Building 10 habang apat pang bangkay ang nakuha ng tropa ng mga sundalo sa Building C26 sa may port area ng lungsod.

                       Ayon kay Galvez ang pinangyarihan ng bakbakan ay siyang pinagtataguan ni Malaysian Jemaah Islamiyah (JI) terrorist Amin Baco na huling nakitang nagtatakbo sa pagtatago sa loob ng gusali kung saan nagkaroon ng mainitang putukan.

                     Samantala, taliwas naman sa sinabi ni PNP Chief Director General Ronald “Bato” dela Rosa, sinabing posibleng isa sa mga nakuhang bangkay sa naturang mga gusali ay si Baco.

                      “There are body counts there in the areas where they are hiding and we believe na hopefully isa si Amin Baco at saka yung si Mahalam, ‘yung isang Indonesian at yung anak ni Isnilon na natitira.. si Abdullah Japilon, ‘yun ang  pinaka-hinahanap natin,” ayon  kay Galvez.

                        Ani Galvez, sa oras na matagpuan na si Baco ay tuluyan na nilang mawawasak ang “chain” ng nalalabi pang Maute-ISIS stragglers at maging ang Abu Sayyaf Group sa Mindanao.

                        Sinabi ni Galvez na naghihinala silang patay na si Baco matapos na makasagupa ang Scout Rangers at 55^th Infantry Battalion ng Philippine Army sa nalalabi pang gusali sa may pantalan na pinagtataguan ng Maute-ISIS stragglers.

                      Nauna rito, sinabi ni dela Rosa na buhay pa si Baco na siyang pumalit sa napatay na si Comman­der Isnilon Hapilon bilang Emir ng ISIS sa Southeast Asia at umano’y siyang namumuno sa may 30 Maute-ISIS stragglers sa Marawi. Ito ay base aniya sa interogasyon sa high risk terrorist na si Indonesian Muhammad Ilham Syahputra na nahuli sa main battle area habang tumatakas sa lungsod ng Marawi noong Undas.

                       Gayunman, nanindigan ang AFP kahapon na watak-watak na at wala nang tumatayong lider ang Maute-ISIS stragglers na nalalabi sa Marawi.

                      Sinabi ni AFP Spokesman Major Gen. Restituto Padilla Jr., matibay ang indikasyon at naniniwala ang militar na patay na si Baco at wala ng lider ang naturang teroristang grupo.

Arestado ang babaeng anak ng tinaguriang drug queen!

                      Arestado ang babaeng anak ng tinaguriang drug queen at convicted drug pusher na si Yu Yuk Lai ma­tapos salakayin ng mga tauhan ng Philippine Drug Enforcement Agency (PDEA) sa kanyang tahanan na ma-tatagpuan lamang sa tabi ng Palasyo ng Malacañang sa San Miguel, Maynila kahapon ng umaga.

                      Kaugnay nito, aabot sa kabuuang P21 milyong halaga ng shabu ang nasamsam ng PDEA sa dalawang magkasunod na raid una sa selda ng drug queen na si Lai sa Correctional Mandaluyong at sa condominium ng kanyang anak sa Maynila.

X

                     Kasong paglabag sa Republic Act 9165 o Comprehensive Dangerous Drugs Act of 2002 ang kakaharapin ng suspek na si Diane Yu Uy, matapos na maaresto dakong alas-10:00 ng umaga sa kanyang condominium unit sa Gen. Solano St., sa San Miguel, Maynila na ilang  metro lamang ang layo sa Gate 1 ng Malacañang Palace.

                      Nakumpiska mula kay Yu ang tinatayang aabot sa dalawang kilo ng shabu, na nagkakahalaga ng P10 milyon.

                       Ayon kay PDEA Director General Aaron Aquino, bago nila isinagawa ang pag­sala-kay ay inimpormahan nila hinggil dito si Special Assis-tant to the President (SAP) Bong Go.

                       Sinabi ni Aquino, nakatanggap sila ng impormasyon hinggil sa illegal na aktibidad ni Uy, kaya’t kaagad na isinagawa ang pagsalakay sa bisa ng isang search warrant.

PSN ( Article MRec ), pagematch: 1, sectionmatch:

                       Si Uy ay sinasabing anak ng tinaguriang “drug queen” na si Yu Yuk Lai na naka­kulong sa Correctional Institute for Women (CIW).

                       Hinala ng PDEA na gina­gamit ng drug queen ang kanyang anak bilang kanyang operator sa labas, habang siya ay nasa loob ng bilangguan.

                         Bago ang pag-aresto kay Uy ay sinalakay ng pinagsanib na pwersa ng PDEA, SWAT, PNP-LRU at BuCor ang selda ni Yu Yuk Lai sa Correctional Institution for Women sa Mandaluyong  City dakong alas-4:30 ng ma­daling araw kahapon.

                         Nakuha sa kubol ng drug queen ang 27 pantyliners na may palamang mga shabu at samu’t saring bloke ng crystals.

                       Tatayang nasa 135    gramo ng shabu ang naku­ha na nakapalaman sa pantyli-ners na ang halaga ay nasa P1 milyon.

                       Narekober din mula sa selda ni Yu Yuk Lai ang da­lawang kilo pa ng shabu na nagkakahalaga ng P10-milyon, 19 na tseke na may halagang  P4.5 milyon at P100,000 cash.

                      Isinagawa ang pagsala-kay sa selda ni Yu Yuk Lai nang makumpirma sa isang buwang surveillance at test buys na may nabibiling sachet ng droga, na nakapalaman sa panty liners.

Maswerte si Faeldon!

                     Nahaharap sa kasong paglabag sa Section 4, Republic Act No. 9165 o Comprehensive Dangerous Act of 2002 si dating Bureau of Customs (BoC) Commissioner Nicanor Faeldon. Drug Trafficking ang kasong ito na isinampa ng Philippine Drug Enforcement Agency (PDEA) na dininig ng panel of prosecutors ng Department of Justice (DoJ). Bunga ito ng paglusot sa BoC ng P6.4-billion shabu shipment na humantong sa isang warehouse sa Valenzuela City.

                     Kasama ni Faeldon na idinemanda ng PDEA sina Milo Maestrecampo, Neil Anthony Estrella, Joel Pinawin, Oliver Valiente at ang mga shipment brokers, importers at consignees kasama ang whistleblower na si Mark Taguba. Ang mga ito daw ay nagsabwatan sa pag-angkat ng ilegal na droga, sa drug trafficking, corruption at obstruction of justice.

                     Ayon kay Faeldon at sa mga opisyal ng BoC na kasama niya sa kaso, hearsay ang ebidensiya laban sa kanila. Inatake nila ang merito ng kaso at bisa ng ebidensiya laban sa kanila. Ang hearsay evidence, sabi naman ng PDEA, ay puwedeng tanggapin sa preliminary investigation ng kaso batay sa desisyon ng Korte Suprema. Ang pagtimbang sa ebidensiya at pagtalakay sa merito ng kaso ay ginagawa, aniya, sa panahon na ng paglilitis.

                    Ang mahalaga kay Faeldon, sa kanyang bentahe, ay may ebidensiya siya at ang DoJ ang dumidinig ng kaso. Sa preliminary investigation, may kalayaang magpasya ang dumidinig sa kaso. Kahit sino sa nagtutunggaling partido ay maaari niyang kilingan depende lang kung paano niya ipaliliwanag ito. May desisyon man ang Korte Suprema sa isang isyu, nasa kanya na ito kung gagamitin ito o babalewalain. Basta maganda lang ang argumento.

                     Tingnan ninyo ang nangyari kay Supt. Marvin Marcos at sa kanyang mga kasamang pulis na nagsagawa ng operasyon na ikinasawi ni Albuera, Leyte Mayor Rolando Espinosa, Sr. Dininig din ng Senado ang kasong ito at ang rekomendasyon ng Senate Committee on Public Order and Drugs ni Sen. Ping Lacson ay sampahan ng murder sina Marcos, et. al. Bakit nga ba hindi, eh, ginawa ang operasyon sa gabi sa loob ng provincial jail na kinapipiitan ng alkalde? Parang mga tupa na inipon sa isang sulok ang mga jail guard na nagtatanod sa piitan. Ang mga CCTV camera sa lugar ay inalis bago pinasok ng mga pulis ang kinalalagyan ni Mayor at dito siya pinatay dahil siya umano ay nanlaban. Unang sinampahan ng murder ng DoJ sina Marcos, et. al., pero nang mag-file sila ng motion for reconsideration, ibinaba ang kaso sa homicide.

                    Wala akong nakikitang dahilan upang malagay sa alanganin ang kapakanan ni Faeldon at ng mga kapwa niya BoC official.

                    Naging tapat siya sa mga nakatataas sa kanya na sangkot din sa kaso dahil hinayaan niyang bumagsak sa kanyang balikat ang lahat ng paratang sa nangyaring shabu shipment. Matapat niyang itinago ang higit na dapat managot sa kasong ito.

                    Kaya, walang dahilan para ipagkait sa kanya ang magandang trato na ibinigay sa mga pulis na nakapatay sa alkalde.

                     Maswerte siya kaysa kina Bureau of Immigration Assistant Commissioner Al Argosino at Michael Robles na nakasuhan ng plunder dahil ang Ombudsman ang humatol sa kanila gayong kung tutuusin wala namang pagkakaiba ang kanilang naging kalagayan: hindi nila ipinahamak ang talagang utak ng anomalya.

Ibang bansa "model" ang PH drug war!

                Pinag-iisipan ng ibang bansa na tularan ang Pilipinas sa pagsugpo sa panganib na dulot ng droga sa kabila ng mga kritisismo ng ilang grupo sa administrasyong Duterte, ayon sa isang opisyal ng Palasyo.

               Sinabi ni Presidential Spokesman Harry Roque Jr. na ang war on drugs ng gobyerno ay naging  “hugely successful” kaya ang nagbabalak ang ilang kapit-bansa natin na magpadala ng “observers” sa Pilipinas.

               “Let us not underestimate the success of the President in the war against drugs. As in fact, other countries now look to us as a model,” sabi ni Roque sa press conference na isinagawa sa Cebu City nitong Linggo ng gabi.

               “Just a few days ago, President Trump himself declared his own version against war, his own war against drugs. And other ASEAN (Association of Southeast Asian Nations) countries are also sending their observers here to find out exactly what steps we are taking that have led to our success in this war against drugs,” sabi niya.

                Sa pagbabahagi sa pinakamahuhusay na hakbangin ng bansa, sinabi ni Roque na gumamit ang Pangulo ng “tremendous political will” upang lutasin ang problema sa droga, at ginawa itong national priority.

                “This is the first time really that we have waged a campaign of this magnitude. And in fact, until the administration of President Duterte came along, we hardly felt that there was any importance ‘no or that they considered the drug problem as a priority,” aniya.

                “It’s only under the administration of President Duterte that we have number one, given a priority to this problem; and number two, used the tremendous political will in countering these problems,” sabi niya.

                   Sa kasalukuyan, sinabi ni Roque na dahil sa local drug crackdown ay libu-libong drug suspects ang naaresto.

                  Nananatili ring malakas ang suporta ng publiko sa drug war sa kabila ng mga alegasyon sa paglabag sa karapatang pantao ng ilang grupo, dagdag niya.

                 Inihayag niya na tumaas nang husto ang presyo ng shabu dahil sa maigting na anti-drug campaign ng gobyerno, kaya hindi na ito kayang bilhin ng maraming tao. Sinabi niya na may “proof that supply has been curtailed as the result of the war against drugs.”

                 Naging agresibo ang Presidente sa kampanya laban sa illegal drugs pero tinuligsa ng human rights advocates dito at sa ibang bansa ang dumaraming diumano’y summary killings at iba pang paglabag sa karapatang pantao.

                  Nanguna ang Simbahang Katoliko kamakailan sa prayer action na naghahangad na maghilom ang sugat na natamo ng bansa mula sa diumano’y extrajudicial killings sa ilalim ng madugong giyera ni Duterte sa droga. Ilang opposition personalities ang dumalo sa aktibidades na ginanap sa EDSA Shrine at kapalit na EDSA 1986 people power monument.

Pinaghahanap na ang bagong lider ng ISIS!

                 Pinaghahanap ngayon ng mga tropa ng pamahalaan ang isang Malaysian na nasa Pilipinas at humalili umano sa napatay na si Isnilon Hapilon bilang  “emir” ng ISIS sa Southeast Asia, ayon sa mga opisyal.

                  Hinahanap ngayon ang Malaysian na si Amin Baco, matapos ihayag ng pulisya na maaaring siya na ang bagong lider ng ISIS, sabi ni Defense Secretary Delfin Lorenzana.

                 “We heard the news that he (Baco) could be the successor of Isnilon as the emir of those terrorists… hinahabol pa namin siya, kung mahuli namin siya di mas maganda,” sabi ni Lorenzana sa mga reporter.

                 “He could be the leader kasi wala namang mas mataas pa sa kanya e…” sabi pa ng defense chief.

                 Una dito, sinabi ni National Police chief Dir. Gen. Ronald dela Rosa na ibinunyag ni Muhammad Ilham Syahputra, ang Indonesian fighter na naaresto sa Marawi City noong nakaraang linggo, na si Baco na ang namumuno sa mga natitirang kasapi ng Maute-ISIS group sa lungsod.

                   “According to him (Syahputra) si Amin Baco [ang leader]. Hindi lang ng remaining stragglers dun, kungdi sa buong Southeast Asia,” ani Dela Rosa.

                     Pinamumunuan umano ni Baco ang di aabot sa 30 straggler, na kinabibilangan ng dalawa pang Indonesian, sa Marawi, anang PNP chief.

                    Nakatanggap din ang pulisya ng impormasyon na maaaring nakalabas na ng Marawi si Baco, pero ito’y di pa nakukumpirma, ani Dela Rosa.

                    “Wala kaming balitang nakalabas siya or nandun pa siya, pero ang tingin namin nandun pa siya sa loob,” sabi naman ni Lorenzana.

                      Sinabi naman ni Armed Forces spokesman Maj. Gen. Restituto Padilla na mga labi ni Baco ang hinahanap ng mga kawal dahil pinaniniwalaang napatay siya sa isa sa mga pinakahuling engkuwentro sa Marawi.

                    “Contrary to recent pronouncements by some officials that it (Maute-ISIS group) is now headed by a certain Amin Baco, the AFP strongly believes that the group is now leaderless and without direction. Amin Baco is believed to have been among those killed in Marawi recently. Baco’s remains is now the subject of an ongoing aggressive search,” sabi ni Padilla sa isang kalatas.

                       Simula pa 2011 ay hinahanap na ng iba-ibang ahensiyang pangseguridad si Baco sa Mindanao.

                      Dating pinangalanan sa mga police at military report si Baco, na gumagamit ng alyas na “Abu Jihad,” bilang miyembro at bomb maker ng Jemaah Islamiyah regional terrorist network.

                       Kabilang siya sa mga target ng operasyon ng PNP Special Action Force sa Mamasapano, Maguindanao, noong Enero 25, 2015, kung saan napatay ang 44 police commando at kapwa niya Malaysian na si Zulkifli bin Hir alyas “Marwan.”

                      Namataan din umano si Baco na kasama ang ilang kasapi ng Abu Sayyaf na na-engkuwentro ng mga sundalo sa Basilan noong Abril 2013 at isa pang sagupaan sa Sulu noong Agosto 2015.

Rhian Ramos lilipat na nga ba sa ibang network?

                 Sa pagtuntong ni Rhian Ramos sa ABS-CBN nitong Sabado para sa presscon ng Fall Back, may natanong kung ano ang pakiramdam niya na nasa karibal na network siya.

                “I feel very lucky actually kasi hindi naman isang opportunity ito na ibinibigay sa lahat, it’s nice to be able to work with people that you don’t usually get to work with, parang nai-expand tuloy ‘yung knowledge ko, enjoy naman,” nakangiting sagot ng aktres.

                  Hindi kaya maintrigang lilipat na siya sa Kapamilya Network?

                  “I think posible namang mangyari na matsismis ng ganu’n, hindi naman ako natatakot doon, I think o siguro in-expect ko na rin. Pero I feel very blessed to be working with a TV project right now with Lovi Poe, Dennis Trillo and Max Collins and also that’s also another comedy so I’m very, very grateful and happy,” masayang tugon ng dalaga.

                  Puwede rin naman niyang maging fall back ang ABS-CBN. 

“Ha-ha-ha, I don’t know what to say du’n, ah, but I’m very happy with everything that I have right now, so I don’t really feel the need to change anything at the moment,” diretsong sagot ni Rhian.

                  First time makatrabaho ni Rhian si Ms. Tetchie Agbayani na puring-puri niya.

                 “Sobrang saya, so much fun at saka natutuwa ako na ‘yung dalawang characters namin at lahat ng eksena magkasama.  Because her energy is so high and the way that she delivered her role, I felt very close to her and protective pero friend pa rin,” paglalarawan ni Rhian.

                  Salo ni Ms Tetchie, “Kasi po sa istoryang ito, ang character ko ang bale nagturo sa kanya na magkaroon dapat ng fall back sa lahat ng bagay kasi si Michelle (character Rhian) works as a location manager doon sa film, ako ‘yung nagpapaalala sa kanya na, ‘hija, dapat lagi kang may plan A, plan B hanggang plan C.  Laging dapat may fall back kaya ako ‘yung bale nag-uudyok sa kanya at nagko-coach sa kanya na dapat laging may plan B para in case something goes wrong with plan A, may plan B siyang puwedeng ipasok.”

                   Hirit naman ni Rhian, “And masaya rin po siyang kasama sa standby area kasi masarap ‘yung food lagi.  Or mag-oorder siya ro’n mismo.”

                   Naniniwala ba si Rhian na dapat may fall back nga?

                  “’Yung experience ko before naging fall back ko, pero by the time na nag-break sila, ako ‘yung in a relationship, ‘tapos siya naman ‘yung naging fall back, so medyo complicated.  Kaya naging fall back kami ng isa’t isa.

                 “Parang nu’ng nag-break sila, niligawan niya ako, pero in a relationship ako, so it created problems with my current relationship and it’s my fault.  Hindi masayang magkaroon ng fall back for me.  Given a chance hindi na lang at saka wala namang masamang mabakante for a while.  I enjoy being alone as much as in a relationship.  It’s both nice.”

                 Pagkatapos ng Q and A sa presscon ng Fall Back ay hiningan ng reaksiyon si Rhian tungkol kay Zanjoe Marudo na first time niyang nakatrabaho.

                 “Hindi kami masyadong nag-uusap, nu’ng bandang second half na ng movie, doon na kami nag-o-open up talaga sa isa’t isa and I wish it happened sooner, pero hayun, mayroon pa naman kaming promo period to enjoy each other’s company,” masayang sagot ng aktres.

                   Nabanggit din ni Zanjoe na awkward ang pakiramdam nila sa isa’t isa sa unang shooting day nila.

                    “Did he really say that? Yes, I agree,” natawang sabi ng dalaga.  “’Buti nag-agree siya, akala ko kasi ako lang magsasabi nu’n. Honestly, nahirapan ako to get to know him especially during the start of the project, feeling ko napaka-mysterious niya, hindi siya nagsasalita, minsan kahit kinakausap mo na siya, magbibigay siya ng one-word answer.

                     “Na-break lang nu’ng I ask him about golf (paboritong sports ni Zanjoe), and then he talked for about good twenty minutes, so he really likes golf, ha-ha-ha.  But I don’t play golf, but siguro nakaka-relate lang ako kasi there are sports that I like to spent time away from work just to for that dahil wala namang bayad mag-sports, di ba?  But it’s important to you kasi it’s passion.  

                      “So naka-relate ako na ‘yung love niya for golf is like my love for racing.  Pero later on dahil din sa mga nangyayari sa mga eksena, nagkukuwento na rin kami kung paano kami nakaka-relate sa character, ‘tapos naging last day, that’s what I felt the closes to him and then nu’ng natapos ‘yung movie, instant sepanx kasi nanghinayang ako ng konti kasi kung kailan patapos na doon pa kami naging tight,” kuwento ni Rhian tungkol kay Zanjoe.

                  Samantala, umaasa si Rhian na maraming makaka-relate sa Fall Back kapag napanood na  dahil siya mismo ay naka-relate kaya malapit sa kanya ang kuwento ng pelikula na mapapanood na sa Nobyembre 15 mula sa Cineko Productions, Inc., distributed ng Star Cinema sa direksiyon ni Jason Paul Laxamana.